საქართველოს სივრცის დაგეგმარების გეგმის შემუშავებისთვის, საკონსულტაციო მომსახურების შესყიდვის მიზნით, საერთაშორისო და ადგილობრივი კომპანიების შერჩევის პირველი ეტაპი დასრულდა.
ინტერესთა გამოხატვის პროცესში აშშ-ის, ევროპისა და აზიის მასშტაბით მოქმედი 19 წამყვანი საერთაშორისო კონსორციუმი მონაწილეობდა. მათ შემადგენლობაში 56 ადგილობრივი და საერთაშორისო, მრავალდარგობრივი კომპანია იყო წარმოდგენილი.
სივრცითი და ქალაქთმშენებლობითი განვითარების სააგენტომ განაცხადები აზიის განვითარების ბანკის (ADB) მიერ შემუშავებული კრიტერიუმების მიხედვით შეაფასა.
მასზე დაყრდნობით საუკეთესო გამოცდილების დანიური, ბრიტანული, ფრანგული, ესპანური და გერმანული 5 კონსორციუმი შეირჩა, რომელიც მომდევნო ეტაპზე სივრცის დაგეგმარების გეგმის საკონსულტაციო მომსახურების შეთავაზებას ერთი თვის ვადაში წარმოადგენს. აღნიშნულ 5 კონსორციუმში სულ 18 საერთაშორისო და ადგილობრივი კომპანიაა გაერთიანებული.
გამარჯვებულ კონსორციუმს სივრცითი და ქალაქთმშენებლობითი განვითარების სააგენტო, აზიის განვითარების ბანკის (ADB) მიერ შემუშავებულ, ხარისხსა და ფასზე დაფუძნებული შერჩევის მეთოდით გამოავლენს.
